R. Lalhmangaiha (19-02-1988 - 21-07-2008)

R. Lalhmangaiha (19-02-1988 - 21-07-2008)

February ni 19, 1988 ah Pu R Laldinthara leh Pi Zoramthangi-te fa pathumna ni turin Durtlang Presbyterian Hospital-ah a lo pianga. An unau hi mipa 5 leh hmeichhia 1 an ni. An unau upat dan indawtin - 1. Johny Zonunmawia ( thla 11 mi niin a boral hlauh). 2. R.Lalnuntlanga, 3. R.Lalhmangaiha, 4. Vanlalruata, 5. Jasmine Lalrinawmi te an ni.

A naupan laiin a dang hi a awk nasa hle thina, a thil sawi turte pawh a duh angin a sawi thei lawklo thin a ni awm e. A nu leh pa ten, ‘Engnge kan rawn hawn ang che?’ tia an khawi lo chhuah dawna an zawh pawhin, a naute hian an lo sawi khalh a, ‘ Ka Ka...’ tiin a lo rak ve mai thin ni awm tak a ni. ‘Kaka’ tiin a hming an phuah ta a, hei hi a nick name-ah a hmang hlen ta a ni!

Kum 2005 September ni 27-ah Lalnunmawii (Temâmi) d/o Pi Lalmawizuali nen inneiin, fapa Jakaria Malsawmdawngkima an nei. R.Lalhmangaiha hi naupan lai atanga zai ngaina leh zai hrat tak niin, Kohhran thil tih nikhuaah pawh tleirawl a rawn nih chhoh phat atanga rawn zai chho in, Cable TV Demand channel-a Gopsel Group hmehchhuah hlawh tak ‘Gospel Echo’ an tihah pawh khan a lo tel fo tawh a; hmun hrang hrangah pawh zaia rawngbawlna te an nei thin a ni.

ZONET-in nikum 2007 a Mizo Idol Contest a buatsaih tum khan Durtlang leitan hming a rawn chhuak ve in, Contestant 1800 zingah Contestant Number 1308 -na niin a rawn zai tan a, Top 180-ah thlan chhuah a niin, third round mi 50 thlan chhuah ah a tel a. Top 10 result puan a nih khan a vannei leh thiam zual Lallawmpuia Fanai, C. Lalthlengliana, Lalhmingliana Chhangte, Remkimi Cherput, Alex Lalchhuankima, Freddy Lalremruata, B. Lalbiakkima leh Lalthlamuani te zinga tel turin thlan tlin a ni leh a. Top 10 zai vawikhatna-ah final a nih zel angin Top 8-ah a inhlang kai a, Top 20 atanga a hla sak lar ‘An Lungleng Ve Ngei Ang’ tih chuan mi tam tak lung a kuai avangin, Top 8 atanga a tla ta khan mi tam tak ui hle a ni.

"Top 8-ah hian tla mahila, ka lawma, zai hi ka chhunzawm zel dawn" tih sawiin, Mizo Idol Contest buatsaih zawh hnuah Mizo Idol Top 10 zingah pawh lar ber pawl leh zaia sawmtu ngah ber zingah rawn tel pha in, Mizoram dung leh vanga mipuiin zaithiam an tih chu an hai rual loh a ni.